¹ Il Cussegl federal constituescha in Uffizi central da cumpensaziun en il rom da l’administraziun federala.

^1bis L’Uffizi central da cumpensaziun è responsabel per la contabilitad da las assicuranzas socialas assicuranza per vegls e survivents, assicuranza d’invaliditad ed urden da cumpensaziun dal gudogn. El maina separadamain ils quints da las trais assicuranzas socialas e fa bilantschas annualas sco er mensilas e quints economics annuals sco er mensils.³²⁶

² L’Uffizi central da cumpensaziun fa periodicamain giu quint cun las cassas da cumpensaziun concernent las contribuziuns incassadas e concernent las rentas e las indemnisaziuns a persunas dependentas d’agid³²⁷ pajadas ora. El surveglia la regulaziun dals quints e po per quest intent controllar sin il plaz ils rendaquints da las cassas da cumpensaziun u pretender mussaments.

³ L’Uffizi central da cumpensaziun procura ch’ils saldos che resultan dals rendaquints vegnian assegnads da las cassas da cumpensaziun al Fond da cumpensaziun da la AVS respectivamain ch’els vegnian bunifitgads a las cassas da cumpensaziun or da quest fond. Per quest intent sco er per conceder pajaments anticipads a las cassas da cumpensaziun po el ordinar pajaments directamain sin il Fond da cumpensaziun da la AVS.

⁴ L’Uffizi central da cumpensaziun maina:

a.

in register central da las persunas assicuradas, che cuntegna ils numers da la AVS attribuids a las persunas assicuradas, ils numers d’assicuranza esters necessaris per realisar cunvegnas internaziunalas d’assicuranza sociala sco er las cassas da cumpensaziun che mainan in conto individual per ina persuna assicurada;

b.

in register central da las prestaziuns currentas, inclusiv las indicaziuns davart la concessiun da rentas estras, che cuntegna las prestaziuns en daners e che serva ad evitar pajaments nungiustifitgads, a facilitar l’adattaziun da las prestaziuns ed ad annunziar mortoris a las cassas da cumpensaziun.³²⁸

⁵ L’Uffizi central da cumpensaziun procura ch’i vegnian resguardads tut ils contos individuals da la persuna assicurada il mument ch’il dretg da sia renta cumenza.³²⁹