¹ Il document da legitimaziun per persunas ch’èn admessas provisoricamain (art. 41 al. 2) vegn emess dal chantun da dimora per maximalmain 12 mais per la controlla e vegn prolungà cun resalva da l’artitgel 84.

² Per reparter las persunas ch’èn admessas provisoricamain è applitgabel l’artitgel 27 LAsil²⁵⁷ tenor il senn.

³ Las persunas ch’èn admessas provisoricamain ston inoltrar la dumonda da midar il chantun tar il SEM. Cun resalva da l’alinea 4 decida quel definitivamain davart la midada dal chantun suenter avair tadlà ils chantuns pertutgads.

⁴ La decisiun davart la midada dal chantun po vegnir contestada mo cun la motivaziun ch’ella violeschia il princip da l’unitad da la famiglia.

⁵ Las persunas ch’èn admessas provisoricamain pon tscherner libramain lur lieu da domicil en il territori dal chantun d’enfin ussa u dal chantun assegnà. Las autoritads chantunalas pon attribuir in lieu da domicil u in alloschi entaifer il chantun a las persunas admessas provisoricamain che n’èn betg vegnidas renconuschidas sco fugitivs e che retiran agid social.²⁵⁸

⁶ ...²⁵⁹

⁷ Per conjugals e per uffants nubils sut 18 onns da persunas ch’èn admessas provisoricamain e da fugitivs ch’èn admess provisoricamain dastga la reuniun avair lieu il pli baud 3 onns suenter l’ordinaziun da l’admissiun provisorica e vegnir inclus en quella, sche:

a.

els abiteschan ensemen cun talas persunas;

b.

igl è avant maun in’abitaziun che correspunda als basegns; e

c.

la famiglia n’è betg dependenta da l’agid social;

d.²⁶⁰

els san communitgar en la lingua naziunala discurrida al lieu da domicil; e

e.²⁶¹

la persuna che vegn reunida na retira betg prestaziuns supplementaras annualas tenor la LPS²⁶² u na pudess er betg retrair talas prestaziuns en consequenza da la reuniun da la famiglia.

^7bis Per la concessiun da l’admissiun provisorica basta – empè da la premissa tenor l’alinea 7 litera d – l’annunzia ad ina purschida da promoziun linguistica.²⁶³

^7ter La premissa tenor l’alinea 7 litera d na vegn betg applitgada per uffants nubils sut 18 onns. Da questa premissa poi ultra da quai vegnir divergià, sch’i èn avant maun motivs impurtants tenor l’artitgel 49a alinea 2.²⁶⁴

⁸ Sche la controlla da la reuniun tenor l’alinea 7 porta indizis ch’igl existia in motiv da nunvalaivladad tenor l’artitgel 105 cifra 5 u 6 CCS²⁶⁵, annunzia il SEM quai a l’autoritad cumpetenta tenor l’artitgel 106 CCS. La dumonda per la reuniun vegn sistida, fin che questa autoritad ha prendì ina decisiun. Sche l’autoritad porta plant, vegn la dumonda sistida fin ch’ina sentenzia cun vigur legala è avant maun.²⁶⁶