Il recurs è inadmissibel cunter:

a.

decisiuns en il sectur da la segirezza interna u externa da la Svizra, da la neutralitad, da la protecziun diplomatica e dals ulteriurs affars exteriurs, uschenavant ch’il dretg internaziunal na conceda betg in dretg sin in giudicament tras ina dretgira;

b.

decisiuns davart la natiralisaziun ordinaria;

c.

decisiuns en il sectur dal dretg da persunas estras che concernan:

1.

l’entrada en Svizra,

2.

permissiuns, a las qualas ni il dretg federal ni il dretg internaziunal na conceda in dretg,

3.

l’admissiun provisorica,

4.

l’expulsiun sin basa da l’artitgel 121 alinea 2 da la Constituziun federala e la spedida,

5.⁵⁷

divergenzas da las premissas d’admissiun,

6.⁵⁸

la prolungaziun da la permissiun da cunfinaris, la midada dal chantun, la midada da plazza da persunas cun ina permissiun da cunfinaris sco er l’emissiun da documents da viadi a persunas estras senza documents da legitimaziun;

d.

decisiuns en il sectur da l’asil che:

1.⁵⁹

èn vegnidas prendidas dal Tribunal administrativ federal, nun ch’ellas concernian persunas, cunter las qualas è avant maun ina dumonda d’extradiziun dal stadi ch’ellas han bandunà per tschertgar protecziun,

2.

èn vegnidas prendidas d’ina instanza precedenta chantunala e concernan ina permissiun, a la quala ni il dretg federal ni il dretg internaziunal na conceda in dretg;

e.

decisiuns davart la refusa da l’autorisaziun da persequitar penalmain commembers d’autoritads u il persunal federal;

f.⁶⁰

decisiuns en il sectur da las acquisiziuns publicas, sche:

1.

i na sa tschentan naginas dumondas giuridicas d'impurtanza fundamentala; resalvads restan recurs cunter acquisiziuns dal Tribunal administrativ federal, dal Tribunal penal federal, dal Tribunal federal da patentas, da la Procura publica federala sco er da las instanzas giudizialas chantunalas superiuras, u

2.

la valur stimada da l'incumbensa che duai vegnir surdada na cuntanscha betg la limita decisiva tenor l'artitgel 52 alinea 1 en cumbinaziun cun l'agiunta 4 cifra 2 da la Lescha federala dals 21 da zercladur 2019⁶¹ davart las acquisiziuns publicas;

f^bis.⁶²

decisiuns dal Tribunal administrativ federal davart disposiziuns tenor l’artitgel 32i da la Lescha federala dals 20 da mars 2009⁶³ davart il transport da persunas;

g.

decisiuns en il sectur da las relaziuns da lavur da dretg public, sch’ellas concernan ina chaussa da dretg da facultad, betg dentant l’egualitad da las schlattainas;

h.⁶⁴

decisiuns en il sectur da l’agid uffizial internaziunal, cun excepziun da l’agid uffizial en chaussas fiscalas;

i.

decisiuns en il sectur dal servetsch militar, dal servetsch civil e dal servetsch da protecziun civila;

j.⁶⁵

decisiuns en il sectur dal provediment economic dal pajais ch’èn vegnidas prendidas durant situaziuns da grevas mancanzas;

k.

decisiuns concernent subvenziuns, a las qualas la legislaziun na dat nagin dretg;

l.

decisiuns davart la taxaziun dals dazis, sche quai vegn fatg sin basa da la tariffaziun u sin basa dal pais da la rauba;

m.⁶⁶

decisiuns davart la prorogaziun u davart la dispensaziun da taxas; en divergenza da quai è admissibel il recurs cunter decisiuns davart la dispensaziun da la taglia federala directa u da la taglia chantunala u communala sin las entradas e sin il gudogn, sch’i sa tracta d’ina dumonda giuridica d’impurtanza fundamentala u sch’igl è avant maun per auters motivs in cas spezialmain impurtant;

n.

decisiuns en il sectur da l’energia nucleara che concernan:

1.

la premissa d’ina autorisaziun u da la midada d’ina permissiun u disposiziun,

2.

l’approvaziun d’ina plan da retenziuns per ils custs da dismessa che resultan avant ch’ina ovra nucleara vegn messa ord funcziun,

3.

autorisaziuns;

o.

decisiuns en il sectur dal traffic sin via davart l’approvaziun dals tips da vehichels;

p.⁶⁷

decisiuns dal Tribunal administrativ federal en il sectur da la telecommunicaziun, dal radio e da la televisiun sco er da la posta concernent:⁶⁸

1.

concessiuns ch’èn stadas l’object d’ina publicaziun uffiziala,

2.

dispitas tenor l’artitgel 11a da la Lescha da telecommunicaziun dals 30 d’avrigl 1997⁶⁹,

3.⁷⁰

dispitas tenor l’artitgel 8 da la Lescha da posta dals 17 da december 2010⁷¹;

q.

decisiuns en il sectur da la medischina da transplantaziun che concernan:

1.

l’inscripziun sin la glista da spetga,

2.

l’attribuziun d’organs;

r.

decisiuns en il sectur da l’assicuranza da malsauns ch’èn vegnidas prendidas dal Tribunal administrativ federal sin basa da l’artitgel 34⁷² da la Lescha federala dals 17 da zercladur 2005⁷³ davart il Tribunal administrativ federal (LTAF);

s.

decisiuns en il sectur da l’agricultura che concernan:

1.⁷⁴

…

2.

la cunfinaziun da las zonas en il rom dal cataster da producziun;

t.

decisiuns davart il resultat d’examens e d’autras valitaziuns da las abilitads, en spezial en ils secturs da la scola, da la furmaziun supplementara e da la pratica da la professiun;

u.⁷⁵

decisiuns en il sectur da las offertas publicas d’acquisiziun (art. 125–141 da la L da las infrastructuras da finanzas dals 19 da zer. 2015⁷⁶);

v.⁷⁷

decisiuns dal Tribunal administrativ federal davart divergenzas d’opiniun tranter las autoritads en il sectur da l’agid uffizial e da l’assistenza giudiziala sin plaun naziunal;

w.⁷⁸

decisiuns en il sectur dal dretg d’electricitad concernent l’approvaziun dals plans d’implants electrics da current ferm e da current lev e concernent l’expropriaziun dals dretgs necessaris per construir e per manar tals implants, sch’i na sa tschentan naginas dumondas giuridicas d’impurtanza fundamentala;

x.⁷⁹

decisiuns concernent la concessiun da contribuziuns da solidaritad tenor la Lescha federala dals 30 da settember 2016⁸⁰ davart las mesiras repressivas preventivas ed ils plazzaments extrafamigliars avant 1981, nun ch’i sa tractia d’ina dumonda giuridica d’impurtanza fundamentala u ch’i saja avant maun per auters motivs in cas spezialmain impurtant;

y.⁸¹

decisiuns dal Tribunal administrativ federal en proceduras da mediaziun per evitar ina imposiziun da taglia che na correspunda betg a las cunvegnas internaziunalas applitgablas en il sectur fiscal.