¹ Cun ina u cun pliras identitads supplementaras pon vegnir inscrits en il register dal stadi civil:

a.

persunas ch’èn da proteger tenor l’artitgel 5 litera e da la Lescha federala dals 23 da december 2011⁷³ davart la protecziun extraprocessuala da perditgas (LPPerd);

b.

collavuraturs dal Post per la protecziun da perditgas tenor l’artitgel 19 alinea 4 LPPerd;

c.

persunas ch’èn activas sco investigaturs secrets tenor l’artitgel 285a dal Cudesch da procedura penala⁷⁴, tenor l’artitgel 73 da la Procedura penala militara dals 23 da mars 1979⁷⁵ u dal dretg chantunal;

d.

persunas ch’èn – sa basond sin l’artitgel 14c da la Lescha federala dals 21 da mars 1997⁷⁶ davart mesiras per mantegnair la segirezza interna – munidas cun ina identitad da finta;

e.

persunas che procuran – sa basond sin l’artitgel 1 litera a da la Lescha federala dals 3 d’october 2008⁷⁷ davart las cumpetenzas en il sectur dal servetsch d’infurmaziun civil – infurmaziuns davart l’exteriur ch’èn relevantas per la politica da segirezza e ch’èn – sa basond sin quai tenor l’artitgel 16 alinea 1 da l’Ordinaziun dals 4 da december 2009⁷⁸ davart il Servetsch d’infurmaziun da la Confederaziun – munidas cun documents da finta e cun legendas.

² Las dumondas d’inscriver ina u pliras identitads supplementaras en il register dal stadi civil ston cuntegnair las indicaziuns da las datas ch’èn d’inscriver e da las basas giuridicas decisivas. Ellas ston vegnir inoltradas en scrit, cun suttascripziun ed en l’original.

³ Las autoritads federalas inoltreschan lur dumondas al Sectur Infostar (SIS) da l’Uffizi federal da giustia (UFG).⁷⁹

⁴ Las autoritads chantunalas inoltreschan lur dumondas a l’Uffizi federal da polizia. Quel examinescha l’autenticitad da l’autoritad petenta e transmetta la dumonda al SIS.⁸⁰

⁵ La registraziun, las annunzias, las communicaziuns uffizialas e la publicaziun da las datas vegnan fatgas en il cas singul sin ordinaziun dal SIS.⁸¹