¹ Ils chantuns reglan la fixaziun ed il pajament da l’agid social e da l’agid d’urgenza per persunas admessas provisoricamain. Ils artitgels 80a–84 LAsil²⁶⁸ davart ils requirents d’asil èn applitgabels. Persunas admessas provisoricamain ston per regla vegnir sustegnidas en furma da prestaziuns realas. La tariffa per il sustegn è pli bassa che la tariffa per la populaziun indigena.²⁶⁹

^1bis Per las suandantas persunas valan – areguard il standard da l’agid social – las medemas disposiziuns sco per fugitivs che han survegnì asil da la Svizra:

a.

fugitivs admess provisoricamain;

b.²⁷⁰

fugitivs pertutgads d’ina expulsiun legalmain valaivla tenor l’artitgel 66a u 66a^bis CP²⁷¹, tenor l’artitgel 49a u 49a^bis LPM²⁷² u tenor l’artitgel 68 da questa lescha;

c.

persunas senza naziunalitad tenor l’artitgel 31 alineas 1 e 2; e

d.²⁷³

persunas senza naziunalitad pertutgadas d’ina expulsiun legalmain valaivla tenor l’artitgel 66a u 66a^bis CP, tenor l’artitgel 49a u 49a^bis LPM u tenor l’artitgel 68 da questa lescha.

² Areguard l’assicuranza obligatorica da persunas malsaunas per persunas ch’èn admessas provisoricamain èn applitgablas las disposiziuns correspundentas davart ils requirents d’asil tenor la LAsil e tenor la Lescha federala dals 18 da mars 1994²⁷⁴ davart l’assicuranza da malsauns.