¹ Ils administraturs da facultads collectivas, las direcziuns da fonds, las chasas da vaglias, las gruppas da finanzas ed ils conglomerats da finanzas ston:

a.

incumbensar ina societad d’audit admessa da la ASR tenor l’artitgel 9a alinea 1 LSR²⁷ cun ina verificaziun annuala tenor l’artitgel 24 LFINMA²⁸;

b.

laschar verifitgar lur quint annual ed eventualmain lur quint dal concern d’ina interpresa da revisiun, che stat sut la surveglianza dal stadi, e quai tenor ils princips da la revisiun ordinaria dal Dretg d’obligaziuns (DO)²⁹.

² Per la verificaziun tenor l’alinea 1 litera a po la FINMA prevair ina periodicitad da la verificaziun da plirs onns, resguardond l’activitad dals survegliads e las ristgas ch’èn colliadas cun quai.

³ Ils onns, durant ils quals i na vegn fatga nagina verificaziun periodica, furneschan ils instituts da finanzas tenor l’alinea 1 in rapport a la FINMA davart il fatg che lur activitad commerziala correspundia a las prescripziuns legalas. Quest rapport po vegnir furnì en ina furma standardisada.

⁴ La direcziun da fonds incumbensescha per sasezza e per ils fonds d’investiziun administrads dad ella la medema societad d’audit.

⁵ La FINMA po far sezza verificaziuns directas.